![](https://img.bomboradyo.com/baguio/2021/12/alleged-criminals-killed-in-shoot-out-in-La-Trinidad-Benguet-8-1.jpg)
BAGUIO CITY – Pimmusay ti tallo nga armado a lallaki a maatap a kameng ti maysa a robbery hold-up/carnapping group iti panakipinnaltogda kadagiti pulis iti deppaar ti Lamut-Shilan Road sadiay Shilan, La Trinidad, Benguet iti agarup 12:35 idi tengngat rabii.
Iti interview ti Bombo Radyo Baguio, kinuna ni PCapt. Marnie Abellanida, panakangiwat ti Police Regional Office Cordillera (PROCOR) a manarimaan ti intelligence monitoring dagiti pulis mainaig iti criminal group a simmang-at iti lokalidad.
Kinunana a sadiay a nakitada ti nalabbaga a kotse a sedan nga awanan plaka iti likod ken plaka nga WIN-580 iti sangwanan.
Imberipikar dagiti pulis iti Land Transportation Office ti nasao a plaka ken sadiay a naamuan a ti plate number ket naka-assign iti sabali a kotse.
Innayonna a sakbay ti insidente ket namin dua a nakaawatda ti tawag manipud kadagiti maseknan nga umili mainaig iti presensia ti nasao a kotse nga agrikrikos sadiay iti dis-oras ti rabii.
Nagpatulong ti engaging team kadagiti pulis ti La Trinidad ken idi asitgan kuma ti maysa a pulis ti kotse ket pinaltogan dagiti pasahero ti kotse ti nasao a pulis sakbayda a pinataray ti kotse paturong iti Lamut-Shilan Road.
Nagresulta daytoy iti hot pursuit operation nupay kabayatan ti panaglibas dagiti suspek ket naibangga ti kotse iti igid ti kalsada.
![](https://img.bomboradyo.com/baguio/2021/12/alleged-criminals-killed-in-shoot-out-in-La-Trinidad-Benguet-2.jpg)
Napalawlawan dagiti pulis dagiti suspek ken imbilinda ti panagsuko dagitoy.
Nupay kasta, pinalpaltogan dagiti suspek dagiti pulis a nagresulta iti panagbales dagiti pulis.
Kinuna ni Abellanida a dead on the spot ti dua kadagiti suspek gapu iti nakaro a tama dagitoy bayat a dead on arrival iti pagagasan ti maikatlo a suspek.
Nupay awan ti nadangran wenno pimmusay kadagiti pulis, natamaan met kadagiti bala ti paltog ti lugan dagiti pulis ti La Trinidad.
Nakumpiskar pay iti nakapasamakan ti insidente ti tallo a high-powered firearm a caliber 45 pistol.
Dinakamat pay ni Abellanida nga imbilinen ni PROCOR Regional Director, PBGen. Ronald Oliver Lee ti naun-uneg nga imbestigasyon ti insidente ken iti panakabigbig dagiti napapatay a lallaki nangruna ta adu ti ID a naala kadagitoy