BAGUIO CITY – Nadangran ti maysa a driver ken ti dua a pasahero kalpasan a naidungpar ti nagluganan dagitoy sadiay Sitio Bulak, Brgy Balbalasang, Balbalan, Kalinga itay agsapa.
Nabigbig ti driver a ni Eric Gonayon Jr., 30-anyos, Municipal Administrator ti Balbalan ken residente ti Poblacion, Balbalan, Kalinga.
Nabigbig met dagiti dua a pasahero a da Christian Dao-wan, 30-anyos, ken Jane Pan-oy, 32-anyos, agpada nga empleyado ti lokal a gobyerno ti Balbalan, ken residente ti Poblacion, Balbalan, Kalinga.
Saan met a nadangran ti tallo pay a pasahero a kadwa dagiti biktima.
Maibasar iti imbestigasyon, daldalyasaten ti Toyota Pick up ti kalsada paturong sadiay Poblacion, Balbalan.
Nupay kasta, napukawan iti kontrol ti driver idi nadanonanda ti naangep ken kurba a paset ti kalsada rason a naidungpar iti kaniggid a paset ti bantay a nangitunda iti panakabaliktad ti lugan.
Dagus a naiturong dagiti biktima iti Western Kalinga District Hospital sadiay Balbalan babaen kadagiti maseknan nga ahensia.
Iti agdama ket agtultuloy ti panagpaagas dagiti biktima.
