KUWAIT- Kinumpirmar ti Department of Migrant Workers (DMW) a karaman dagiti tallo nga overseas Filipino workers (OFWs) ti pimmusay iti uram iti maysa a pasdek idiay Kuwait idi laeng kalman.
Sigun kenni Migrant Worker Secretary Hans Leo Cacdac, pimmusay dagiti tallo nga overseas Filipino workers (OFWs) gapu iti smoke inhalation.
Dagiti biktima ket karaman kadagiti sangapulo ket maysa nga overseas Filipino workers (OFWs) a mangmangged iti maysa a Kuwaiti contruction company nga adda iti uneg ti nauram a pasdek.
Kabayatanna, agtaltalinaed a kritikal ti kasasaad dagiti dua nga overseas Filipino workers (OFWs) nga adda iti pagagasan bayat a natalged met ti kasasaad dagiti innem a kadua dagitoy.
Iti baet dayta, makipagsarsarita metten dagiti opisyales ti Pilipinas kadagiti amin a pamilya ken kakabagyan dagiti sangapulo ket maysa a naapektara nga overseas Filipino workers (OFWs).
Malaksid iti dayta, imbilin met ti Overseas Workers Welfare Administration (OWWA) ken ti Migrant Workers Office idiay Kuwait tapno makitinnulong dagitoy iti panagregget ti embahada ti Pilipinas idiay Kuwait tapno marepatriate dagiti bangkay dagiti tallo nga overseas Filipino workers (OFWs).
Impasigurado met dagiti maseknan nga opisyales a mangipaay dagitoy iti tulong ken suporta para kadagiti nadakamat a naapektaran nga overseas Filipino workers (OFWs) kasta met dagiti pamilya dagitoy kas maibasar iti pammilin ti presidente.
Maipalagip a pakabuklan iti uppat a pulo ket siyam nga indibidual ti pimmusay gapu paylaeng iti nasao nga uram.//Rose
