INCHEON, SOUTH KOREA – Manarimaan paylaeng ti imbistigasion dagiti maseknan nga otoridad iti rason ti pannakauram iti tallo pulo a pakturia sadiay Incheon sadiay South Korea ita nga aldaw ti Domingo, October 20, 2024.
Sigun iti Incheon Fire Department, dagus a nagramaram ti uram gapu iti napigsa nga angin, isu’t gapuna a dumanon iti pito nga oras sakbay a nasebseban daytoy.
Maibasar iti imbestigasion, nagrugi ti uram iti pasado alas ocho iti agsapa partikular sadiay Wanggil-dong, Seo District iti Incheon.
Nupay kasta, awan ti nadangran nga indibidual iti napasamak nga insindete.
Kabayatanna, nagpakdaar ti Incheon Seo District Office kadagiti residente a liklikanda a lang-apen ti asuk ken kinniddawda kadagiti hikers iti bantay nga asideg iti insidente nga umakarda kadagiti natalged a lugar ken saanda a sumrek iti bantay nga asideg iti daytoy.
