Impakaamo ti Department of Health a nakailistada ita a tawen ti tallopulo ket uppat a kaso ti sakit, mainaig iti pudot iti intero a pagilian gapu paylaeng iti agtultuloy a panagngato ti dangerous heat index iti dadduma a paset ti pagilian.
Maibasar iti kaudian a datos ti nasao nga ahensia, nairekord ti tallopulo ket uppat a kaso ti sakit mainaig iti pudot manipud Enero 1 angingga Abril 24 iti agdama a tawen idiay Central Visayas, Ilocos Region ken Soccksargen.
Iti nasao a lugar, innem kadagitoy ti pimmusay, ngem manarimaan ti beripikasion ti nasao nga ahensia iti rason ti ipupusay dagitoy.
Kabayatanna, immuna nga impablaak ti nasao nga ahensia a makapasar ti napeggad a libel ti heat index a 42 anginga 51 degrees Celsius ti Dagupan City, Pangasinan; Aparri, Cagayan; Tuguegarao City, Cagayan; Infanta, Quezon; Puerto Princesa City, Palawan; Aborlan, Palawan; Legazpi City, Albay; Virac (Synop), Catanduanes; Masbate City, Masbate; Central Bicol State University of Agriculture in Pili; Camarines Sur; Roxas City ken dadduma pay.
Gapu iti dayta, agtultuloy ti pakdaar ti Department of Health iti publiko kontra kadagiti sakit mainaig iti pudot nga ad-adda a mapasaran, no nakaro ti temperatura, kas iti heat cramps, heat exhaustion, ken heat stroke.
Malaksid iti dayta, binalakadan pay ti nasao nga ahensia ti publiko a kanayon nga aginum ti danum, agtalinaed iti lugar nga addaan iti linong wenno nalamiis, agusar ti proteksion kontra iti init kas ti payong, sumbrero, sunblock ken limitaran dagiti aktibidad iti ruar iti nagbaetan ti 10 a.m. agingga iti 4 p.m.
