Nangbukel ni Public Works Secretary Vince Dizon iti task force para iti Oplan Kontra Baha iti gobyerno nga idaulan iti Department of Public Works and Highways (DPWH).
Imbilin ti nasao nga opisyal ti panakaaramid iti kapada a taskforce units kadagiti 17 DPWH regional offices iti intero a pagilian.
Nadutukan met kas task force commander ni Public Works Undersecretary for special concerns Charles Calima Jr. nu sadino, naipaayan dagitoy iti innem a bulan a timeline tapno leppasen ti trabahoda.
Sigun kenni Dizon, kasapulan a makikoordinar ti nasao a task force iti Metropolitan Manila Development Authority (MMDA), Department of Environment and Natural Resources (DENR), Department of the Interior and Local Government (DILG), ken kadagiti daduma pay a partnerda a pribado a sektor para iti panakaiyimplimintar ti programa nga Oplan Kontra Baha:Nationwide Waterways Clearing and Cleaning Operations.
Innayonna a naiyuswat ti nasao a programa tapno maliklikan ti panakailatang iti dakkel a gatad iti kwarta para kadagiti flood control.
