Manamnama a maregulate itan dagiti tattoo dagiti aplikante ken personnel ti Philippine National Police.
Sigun kenni PNP spokesperson Police Colonel Jean Fajardo, daytoy ket nakabasar iti Memorandum Circular 2024-023 a naaprobaran idi Marso 19 ken epektibo sangapulo ket lima nga aldaw kalpasan ti pannakaipablaakna.
“Dagiti sumrek ken addaan panggep a sumrek iti PNP babaen ti lateral entry, dagiti kadete iti PNPA, dagiti sumrek iti patrolman ken patrolwoman, nakedngan a saanda a makastrek iti PNP nga addaan ti tattoo,” kinuna.
Kabayatanna, dagiti police officers nga addaan ti tattoo ket sakbay ti kinaepektibo ti baro a polisiya wenno pagannurutan ket kasapulan nga ideklarada dagiti amin a paset nga addaan ti tatto ket saandan mabalin nga agpa-tattooo nangruna iti paset ti bagi a makita nu agsuot ti uniporme.
“Nu siyak ti pulis nga agdama nga adaan ti tattoo iti bagi ket ikabil ko nu anya dagiti specific nga addaan ti tattoo”, kinuna ti nasao nga opisial.
“Kalpasan nga ag-epektibo ti memorandum circular ket saanen a mabalin nga aginayon ti tattoo iti bagik nangruna iti visible bayat a nakakawes ti uniporme,” innayonna.
Nu pay kasta, inlawlawag ni Fajardo a mailaksid dagiti tattoo para iti aesthetic purposes kas ti kiday.
Karaman kadagiti tattoos a maipawil ket dagiti mainaig iti “extremism”, “illegal activities”, ken “indecency.”
“Saan met a nasayaat a nakakawes ti uniporme dagiti pulis a napnuan ti tattoo. Isut gapuna a mabalinda nga agpa-tatto ngem iti saan a visible a paset ti bagi”, kinuna ni Fajardo.
