Manarimaan paylaeng ti beripikasyon ti Local Government Unit iti munisipyo ti La Trinidad seknan iti insubmitir a tax declaration dagiti indibidual a nangipatakder iti maysa a pasdek sadiay Brgy. Beckel ken pinagbalinda a private parking area ti igid ti kalsada sadiay.
Iti panakiuman ti Bombo Radyo kenni La Trinidad Mayor Romeo Salda, kinunana nga idi nangipaay ti local government unit ti munisipyo ti La Trinidad iti notice of demolition a naituding inton June 19 kadagiti maseknan nga indibidual ket nangisubmitir met dagitoy iti tax of declaration.
Gapu iti dayta, inyebkasna a manarimaan ti plotting ti Municipal Engineering Office tapno mapaneknekan ti tax declaration ti pamilya a nangipasdek iti pasilidad ken nangiparada kadagiti luganda sadiay.
Nupay kasta, immunan nga indeklara ti Department of Public Works and Highways a ti nasao a kalsada ket passet ti road right of way ken nangipaulog metlaeng ti anti squatting task force iti authority kenni Mayor tapno ma-demolish ti pasdek sadiay rason no apay a nangipaay dagitoy iti notice of demolition.
Maipalagip nga immunan nga immapela dagiti summagmamano a motorista nga agdaldalyasat sadiay Brgy. Beckel, La Trinidad, Benguet gapu kadagiti lugan a nakaparada iti igid ti kalsada.
Maamak dagitoy gapu ta posible a mangitunda iti aksidente dagiti nakaparada a lugan.
Maibasar iti impablaak daytoy iti social media, agparparang a nagbalinen a private parking area ken junkshop area ti nasao a paset ti kalsada.
Ti nasao a paset ti munisipyo ket sigud a lay by area ken view deck idiay Brgy. Beckel ngem saan metten a maaramat daytoy ti publiko.
