BAGUIO CITY–Nakemmeg ti maysa a taxi driver a wanted person ken maatap a miembro ti acetylene gang babaen iti bileg ti warrant of arrest sadiay Purok 2, Gibraltar, Baguio City idi kalman.
Nabigbig daytoy a ni Arnel Paligpig Calisog, 40-anyos.
Naamuan a ti warrant of arrest ket impaulog ni Presiding Judge Edgardo Padilla ti First Municipal Circuit Trial Court, San Teodoro-Baco-Puerto Galera sadiay Oriental Mindoro.
Sumangsango ni Calisog iti kaso a robbery nga addaan dusa a panakaibalud iti uppat a tawen ken dua a bulan.
Nailanad iti report ti pulisya a ni Calisog ket kameng ti Allen Langtiwen Criminal Gang nga addaan operasyon ti robbery babaen iti acetylene wenno bolt cutter iti nagduduma a paset ti pagilian kas maibasar iti listaan ti Directorate for Intelligence.
Nailanad pay iti report a ni Calisog ket nakalista a maikalima a Top Most Wanted Person ti Puerto Galera iti Municipal Level iti umuna a kwarter ti agdama a tawen.
Manamnama met a maiturong daytoy sadiay Oriental Mindoro para iti panakaidatagna iti korte.
