Impetteng ti maysa a taxi driver a nangtulong iti nabugbog nga estudyante sadiay Poblacion, Tuba, Benguet a nakasagana daytoy a tumulong iti financial wenno pammabaga iti biktima.
Iti pannakiuman ti Bombo Radyo kenni Benjamin Toledo Jr. maysa a taxi driver, kinunana a paturong daytoy iti siudad ti Baguio idi nakitana a bugbugbugen dagiti innem nga estudyante ti maysa metlaeng a kaduada nga estudyante.
Gapu iti dayta, kinunana a saan a nagduadua daytoy a tulungan ti nasao nga ubing agsipud ta maasyan daytoy kenkuana.
Impettengna a naragsakan met ti biktima idi tinulunganna daytoy ngem saan a nakapagsao a dagus gapu ta nablangko ti panunot daytoy.
Dagusda met nga inturong daytoy iti ospital kaduana ti councilor sadiay para iti panakataming.
Impeksana met nga agturong daytoy iti pagadalan dagiti estudyante inton lunes tapno makisao iti principal ken iti Department of Social Welfare and Development.
Kagiddan dayta, kiddawna kadagiti nagannak a saanda nga itolerate dagiti annak dagitoy nga agaramid iti saan a nasayaat tapno masursuruan dagitoy.
Kiddawna metlaeng iti nasao a munisipyo a nayunanda pay dagiti agpatrolya nga opisyal wenno tanod tapno maliklikan ti kapada nga insidente.
