BAGUIO CITY – Pimmusay ti maysa a taxi driver kalpasan a binagbagsol dagiti saan pay a nabigbig a suspek sadiay Mulberry Alley, Km.4 Asin Road, Baguio City itay parbangon.
Nabigbig ti biktima a ni Angel Umali Sarmiento, addaan iti legal nga edad, addaan iti asawa, residente ti Pines Park, La Trinidad, Benguet ken ti imanmanehona a taxi ket addaan iti trade name a “Jane-Niña taxi” ken plaka nga AYT-933.
Iti panakiuman ti Bombo Radyo kenni SPO4 Joel Pay-an, imbestigador ti nasao a kaso, kinunana a dua a lalaki ti suspek iti nasao a krimen.
Kinunana a maysa a concerned citizen ti nakangeg iti napigsa a busina iti batog dagitoy a kalsada ken idi nagsirip iti tawa ket nakitana ti komosyon iti nakasardeng a taxi.
Dagus daytoy a nagpatulong kadagiti kaarubada ngem idi asitganda ti taxi ket awanen dagiti suspek a mapapati a nagtaray iti direksyon ti Irisan Dumpsite bayat a ti driver ket mapukpukaw.
Iti panagsapol dagitoy ket nakitada ti dara-dara ken nakadasay a biktima iti baba ti kalsada.
Kinuna ni SPO4 Pay-an a posible a limmaban ti biktima kadagiti suspek gapu iti sinagrap daytoy a bagsol iti tenged ken kanawan a luppona, ken dagiti sugat iti ima daytoy.
Dinakamatna a mapukpukaw metlaeng ti cellphone ken wallet ti biktima.
Iti agdama ket agtultuloy ti imbestigasyon ti pulisya iti nasao a krimen, ken kitkitaenda nu adda dagiti CCTV cameras iti ruta a nagnaan ti nasao a taxi para iti posible a panakatunton dagiti suspek.
