Maguyguyugoy ti publiko nangnangruna dagiti pasaheros nga ireportda nu adda dagiti taxi a saanda kayat a mangilugan wenno dagiti agpilpili kadagiti iluganda.
Daytoy ket kagidan iti panagruar dagiti reklami seknan kadagiti taxi drivers iti siudad nga agpilpili ken saanda kayat a mangilugan kadagiti pasaheros.
Sigun kenni Mayor Benjamin Magalong, mabalinen nga iyawag dagiti reklamo iti 911 tapno maireport daytoy.
Mabalin metlaeng nga agreklamo babaen iti smart city mobile application a Baguio In My Pocket (BIMP).
Innayona pay a nu mabalin ket uray ipostda dagitoy uray awan ti plate numberna gapu ta ada itan ti Artificial Intelligence ti Smart Command Center a mabalin a mangtrackdown kadagiti taxi.
Nupay kasta, nasaysayaat latta nga alaenda ti description, plate number ken dadduma pay a detalye para iti naparpartak a pannakaaddress dagiti reklamo.
Kabayatanna, sigun met iti sumagmamano a taxi driver a nakapatang ti Bombo Newsteam, inlawlawagda met a saan nga iti amin a kanito ket igagagara a pilpilyen wenno saan nga ilugan dagiti taxi drivers dagiti pasaheros gapu ta mairana daytoy iti shifting wenno reshuffle dagitoy.
Innayon dagitoy nga iti dadduma ket overloading metlaeng ti rason isut gapunna a saanda nga ilugan dagiti dadduma a pasaheros.
Kagidan dayta, agkidkiddaw dagitoy iti pannakaawat kadakuada a taxi drivers iti siudad.
Iti sabali a bangir, adda dagiti sumagmamano a taxi drivers a talaga a mangpilpili iti pasaheros nangnangruna nu adayo ti pagturongan dagitoy. //via Bombo Noveh Organo
