BAGUIO CITY – Agtaltalinaed a napintas ti performance dagiti atleta ti rehion Cordillera iti manarimaan a Palarong Pambansa 2018 sadiay Vigan, Ilocos Sur.
Iti kaudian a medal tally ti DepEd – Cordillera, nakailista ti Team Cordillera Fearless Highlanders iti 17 a gold medals, 10 a silver medals ken 10 a bronze medals.
Kabayatanna, arigna inulit ti maysa a taekwondo jin ti naaramidan ti amana para iti Team Cordillera iti Palarong Pambansa iti ay-ayam a taekwondo.
Kasaruno daytoy ti panangabak ni Aesha Oglayon manipud Baguio City iti dua a gold medal ken maysa a broze medal iti taekwondo idi kalman.
Sigun iti Grade 5 student, saanna a ninamnama ti panangabakna gaputa adu dagiti nakalkalabanna manipud kadagiti dadduma a national ken international events a nakasangona manen idi kalman.
Kinunana a napintas ti panagsagana ti host province para iti ay-ayamda gaputa nakasagana amin a venue ken dagiti aramaten dagitoy iti ay-ayam.
Innayonna a dakkel a tulong ti suporta nga ipakpakita dagiti nagannak, coaches ken gagayyemda iti performance dagitoy.
Naamuan daytoy ti kaunaan a gundaway a makipaset ni Aesha iti Palarong Pambansa ngem nakipaspaseten daytoy kadagiti nagduduma a national ken international events iti taekwondo bayat nga agserserbi a coach-na ti amana a ni Arnold Oglayon, ti kaunaan a nakaala ti gold medal iti taekwondo para iti team Cordillera iti Palaro idi 1998 ken sigud a miembro ti national taekwondo team ti Pilipinas.
Nagun-od ni Aesha ti dua a gold medals iti Taekwondo Elementary Girls Team kaduana da Acey Oglayon ken Khyla Guinto ken iti Taekwondo Pair Poomsae kaduana ni Joshua Erece.
Ipampannakkel met ni Arnold Oglayon, ti taekwondo coach ti Team Cordillera ti anakna a ni Aesha Oglayon a nakagun-od iti dua a gold medal ken maysa a broze medal iti nasao nga ay-ayam iti manarimaan a Palarong Pambansa 2018.
Sigun kenkuana, ‘super proud’ daytoy nga ama nangruna ta nakayatan ti anakna ti pagaayatna met nga sport.
Innayonna nga arapaapna a makadanun dagiti annakna iti national team ti pagilian ken makaay-ayam dagitoy iti Olympics.
Naamuan nga anakna metlaeng ni Acey Oglayon a maysa kadagiti nakagun-od iti gold medal iti Taekwondo Elementary Girls Team kaduana da Aesha Oglayon ken Khyla Guinto.
Dinakamatna pay a nagbalin a dekket ti laban ti Team Cordillera kadagiti dadduma a rehion iti nasao nga ay-ayam nangruna ta tunggal rehion ket addaan napasayaat a performance gapu kadagiti inala dagitoy a coaches manipud iti national team.
Kabayatanna, nakagun-od met ni Adrian Paul Yadao iti gold medal iti Taekwondo Sparring, bayat a gold medalist met ti Team Cordillera iti Taekwondo Elementary Boys Team a bukbuklen da Joshua Erece, Cye Evangelista ken Wreily Canao.
Naka-silver medal met ni Kamille Calaycay iti Taekwondo Sparring bayat nga agpada a naka-bronze medal da Joshua Erece ken Aesha Oglayon iti Individual Poomsae.
Iti agdama ket agsagsagana manen ti team Cordillera para iti sumaruno a torneyo a pasetan dagitoy.