BAGUIO CITY–Nalidayan dagiti opisial ti Department of Education-Cordillera iti bimmaba a ranggo ti Fearless Highlanders wenno Team Cordillera iti Palarong Pambansa 2019 sadiay Davao City nga agleppas ita nga aldaw .
Maibasar iti pinal a Medal Tally, nakagun-od laeng ti Team Cordillera iti 14 a gold medals, 13 silver ken 24 bronze medals para iti maika-10 a pwesto.
Addayo a bimmaba ti standing ti rehion Cordillera nu idilig iti nagun-odanda idi napalabas a tawen a nagleppas iti maika-lima a pwesto
Sigun kenni Baguio Schools Division Supt. Federico Martin, pimmintas ti abilidad dagiti atleta iti nagduduma a rehion nangruna kadagiti sports events.
Kinunana kimmapoy met laeng dagiti runners ti Cordillera gapu iti epekto ti kinabara ti panawen sadiay Davao City nu idilig iti nalamiis a temperatura ditoy rehion.
Inaklonna a kangrunaan a makitkitada a parikot iti bimmaba a performance ken standing ti rehion Cordillera ti kinakurang iti umdas a panawen iti panagsanay dagiti atleta nangruna kadagiti Team Sports.
Kinunana nga adda ti bukod a panagsanay dagiti tunggal Division Office wenno probinsia a nagtaudan dagiti atleta ngem kurang ti panawenda nga agsanay para iti sibubukel a grupo iti rehion.
