Balligi a naidepensa ti La Trinidad ti korona dagitoy iti 2nd season ti Cong Eric Go Yap Congressional Cup Benguet Basketball League kalpasan ti panangabak da iti game 2 kontra iti Itogon iti iskor a 95-88 idiay Wangal Sports Gymnasium.
Inyawat ni Cong Yap ti championship trophy ken P200,000.00 cash prize iti defending champions bayat a naited met ti kanayunan a P150,000.00 para iti napili dagitoy a grupo wenno asosasyon.
Naragsak met nga inawat ti Itogon ti 1st runner up trophy ken P150,000.00 a gungguna ken kanayunan met a P100,000.00 iti benepisyaryo.
Ti Kabayan ti nakagun-od ti 2nd runner up ken P100,000.00 a cash incentive ken P80,000.00 iti napili nga organisasyon.
Makaawat met ti Bokod ti P100,000.00 a premyo kas 3rd runner up nu sadino ti kagudwa dita ket premyo da bayat a ti nabati ket maiwaras iti grupo a napilida a benepesyaryo.
Dagiti nagleppas iti maikalima a pwesto agingga iti maikasangapulo ket tallo ket naikkan iti P10,000.00 kas premyo ken kanayun a sangapulo a ribo a pisos iti grupo a napili da.
Nabigbig kas Most Valuble Player iti maikadua a season ni Kim Padawag ti Itogon nga addaan statistical average a 9.7 ppg, 6.8 rpg, 6.9 apg, 2.5 spg, 1 bpg.
Finals MVP ni Bryan Gravilez, Scoring champ ni Kurt Tamiray ti Atok bayat a ti Rookie of the year ket ni Rudolph Eilinger ti Kapangan.
Naiyawed met ti bunggoy ti Bakun ti Sportsmanship trophy ken napadayawan ni Randy Alis ti Kabayan kas Coach of the Year.
