BAGUIO CITY – Agkidkiddaw iti tulong ti Baguio City Polie Office (BCPO) kadagiti maseknan nga ahensia para iti panaka-enhance ti video footage a pakakitaan iti panakakawtibo ti maysa a baro sadiay Irisan, Baguio City ngem nasarakan laengen a bangkay nga awanan ulo sadiay Ambassador, Tublay, Benguet idi napalabas a bulan.
Sigun kenni PCol. Allen Rae Co, dadaulo ti BCPO, kasapulanda ti tulong iti teknikal nga aspeto tapnu mapasayaat ti video ken nalawag a makita dagiti rupa dagiti suspek.
Inaklonna a marigatanda a mangbigbig kadagiti suspek a nakita iti video gaputa nakasuot pay dagitoy iti facemask.
Innayonna nga addan ti koordinasyonda iti Land Transportation Office para iti panakabigbig ti agtagikua iti lugan a naaramat iti panagkawtibo iti biktima a nabigbig a ni Harjan Lagman.
Sigun pay kenkuana, nakasaodan dagiti testigo iti insidente ngem saan met dagitoy a mairupaan dagiti suspek.
