Inlawlawag iti Department of Health-Cordillera (DOH-CAR) a saan a mabalin nga aramiden a rason ti technical problems wenno kinakurang iti format iti PWD ID number tapno saan a maipaayan iti diskwento ken benepisio iti persons with disabilities (PWDs).
Iti naisayangkat a Regional Committee on Disability Affairs 2nd Quarter Meeting, kinuna ni Shamgar Douglas Mangida Jr. a ti Philippine Registry for Persons with Disabilities (PRPWD) ket opisial a basaran iti panagberipikar kadagiti PWD, ngem saan a maaw-awanan iti bileg ti maysa a valid ID uray adda ti pakaseknan iti panagruar daytoy iti sistema.
Sigun kenni Mangida, kadawyan nga isyu ti kinakurang wenno saan a maitunos a 16-digit PWD ID number nga agbalbalin a rason iti saan a dagos a panagruar iti rekord iti PRPWD database. Nupay kasta, impaganetgetna a rumbeng a dagos nga ipaay dagiti establisimiento ti kinakurang a pribilehio nu nangipakita iti valid PWD ID ti maysa nga indibidual.
Pinalagipanna metlaeng dagiti service provider nga umawat paylaeng iti photocopy wenno nalawag a ladawan iti PWD ID bayat a maisaysayangkat ti beripikasion iti lokal a gobierno wenno DOH office.
Kayatanna, kinuna ni Dr. Sam Aquino iti Persons with Disability Affairs Office-Baguio nga addan ti bukod nga online verification system ti siudad usar ti Open Government Data tapno mapaneknekan dagiti locally issued PWD IDs. Impettengna a makatulong metlaeng ti PRPWD system tapno maliklikan ti doble a registration dagiti PWD iti nagduduma a lugar.
