Mapagsarsaritaan ita iti social media ti teenager idiay India a maibagbaga a nangblackmail iti inana babaen iti saanna a pannangan iti uneg ti tallo nga aldaw tapno maigatangan iti iPhone.
Maysa a short video a naala iti uneg ti smartphone shop ti nagviral idi napalabas a lawas a mangipakpakita iti teenager a lalaki a nangaklon nga ingagarana a mabisinan iti tallo nga aldaw tapno makumbinsarna ti nakurapay nga inana nga aggatang ti baro nga iPhone para kenkuana.
Nakita metlaeng iti video ti facial expression ti ina a marigrigatan.
Naammoan a ti ina ket agilaklako laeng iti sabsabong iti ruar ti templo.
“I sell flowers outside a temple and I gave him the money to buy the phone because he did not eat anything for three days” kinuna ti ina.
“I am happy but I want him to earn and bring back the money” innayon ti ina.
Minilmilyon metten nga indibidual ti nakakita iti nasao a video a nangitunda iti debate maipapan iti epekto ti gadget iti agdama a henerasyon.
Ado met a netizens ti nangbabbalaw iti teenager ken inakusaranda daytoy ti financial and emotional torture ken insensibility iti nagannakna.
