BAGUIO CITY – Aramaten ti lokal a gobyerno ti Bauko, Mt. Province ti maysa a teknolohiya manipud Norway a mapapati a mangikkat iti angot kadagiti chicken dung ken dadduma a rugit dagiti dingwen.
Sigun kenni Mayor Abraham Akilit, babaen iti daytoy ket maikkat ti panagadu dagiti ngilaw kadagiti lugar sadiay nga agpapataud iti nateng tapnu maipasigurado ti nasalun-at nga aglawlaw ken maikkat ti angot manipud kadagiti maar-aramat nga abono a rugit ti manok.
Kinunana a no agballigi ti ‘pilot test’ ti teknolohiya ket agresibo a maital-o daytoy kadagiti mannalon sadiay.
Innayonna a dakkel a parikut dagiti umili nga agnanaed iti asideg dagiti garden a pakaiduldulinan dagiti suplay ti nasao nga abono ti panagadu dagiti ngilaw.
Naamuan a maysa ti Bauko kadagiti munisipyo iti Mt. Province nga agpapataud ti nateng a maiturturong iti La Trinidad Vegetable Trading Post.
