BAGUIO CITY – Insumitiren ti lokal a gobyerno ti Tadian, Mt. Province ti letter request dagitoy iti Mines and Geosciences Bureau (MGB) – Cordillera para iti panakaipatungpal ti imbestigasyon ken inspeksion kadagiti timmaud a tension cracks wenno rengngat iti maysa a bantay sadiay Sitio Am-o, Barangay Poblacion idi kalman.
Kinuna ni Tadian Vice Mayor Alfonso Polan a gapu kadagiti nasao a rengngat ket nagbakwit dagiti uppat a pamilya a bukbuklen dagiti 14 nga indibidual ken nakidagus dagitoy kadagiti kakabagianda.
Innayonna a kiniddawda a no sumayaat ti sasaaden ti panawen ket maipatungpal ti nasao nga inspeksion ken imbestigasyon.
Kinunana met nga awanen ti dadduma a parikut iti masakupanda a munisipyo.
Nupay kasta, agtultuloy ti panangmonitorda iti disso a nakakitaan kadagiti renggat ken iti entero a Tadian tapnu awan ti dadduma a tumaod a parikut sadiay.
