BAGUIO CITY – Naballigi ti “P10 Per Kilo Drive” a maysa a relief operation para kadagiti nagbalin a biktima ti panagbettak ti Taal Volcano sadiay Batangas.
Iti interview ti Bombo Radyo kadagiti coordinators ti donation drive a da Tata Longanilla ken Paul Joseph Nuval, kinunada a nangrugi ti kampanya iti personal nga inisyatibo a tumulong kadagiti nasao a biktima.
Sigun kadakuada, ti plano ket gumatangda kadagiti nateng iti presyo a P10 tunggal kilo para iti 200 kilos a natnateng.
Nupay kasta, nanayonan ti nasao a kaadu dagiti nateng babaen iti pledges dagiti am-ammoda.
Dinakamatda nga iti uneg ti tallo nga aldaw ket dimmanon iti 2,000 a kilos ti nagduduma a nateng ti nagatangda agingga a dimmanon iti 10 tons idi Sabado, January 18.
Sigun kenni Nuval, P90,000 manipud iti pledges ti naaramat a nanggatang kadagiti natnateng bayat a ti dumanon 4 tons a natnateng ket indonar dagiti mannalon iti La Trinidad Trading Post.
Innayonna a nagbalin a batang ti Northen Luzon Command ti Philippine Army ti siyam a military trucks a nangilugananda kadagiti donasyon, pakairamanan ti food packs, bagas ken danum manipud Philippine Military Academy ken iti maysa a civic group.
Naiwaras dagiti nasao a tulong iti 2,000 a pamilya kadagiti 16 nga evacuation centers sadiay Nasugbu, Batangas ken kadagiti residente iti Barangay Cumba iti munisipyo ti Lian ken iti munisipyo ti Tuy sadiay Batangas.
Innayon pay ni Nuval a silulukatda a mangikoordinar no adda pay dagiti maawatda a donasyon wenno tulong para kadagiti biktima ti panagbettak ti Taal Volcano.
