Saan a kumbinsido ti Alliance of Concerned Teachers (ACT)-Cordillera Union President Joel Capulong nga agbenepisyo dagiti estudyante iti trimester wenno three-term school calendar a pinirmaanen ni President Ferdinand Marcos Jr.
Iti panakiuman ti Bombo Radyo kenni Capulong, inlawlawagna nga awan ti naangay a “massive consultation” para iti nasao a tignay iti baet a kiniddawda daytoy tapno madengngeg ti kapanunutan dagiti mannursuro nangruna dagiti rank-and-file.
Gapu iti kinaawan ti konsultasyon,kinuna ni Capulong a naklaatda idi naipadamag ti panakaaprobar ti three-term school calendar nangruna ket naituding a maiyimpliminar iti School Year 2026-2027.
Impetteng ni Capulong a ti nasao a transisyon iti school calendar ket mangitunda iti nakaro a pakaseknan kadagiti mannursuro a kasapulan manen nga ag-adjust, iti baet a saan pay naminpingsan a nalpas ti panag-adjust dagitoy kadagiti immunan a nagbaliwan iti curriculum kas iti K-12 Curriculum, ti MATATAG Curriculum,ken ti Strengthened Senior High School (SHS) Curriculum a sigun iti opisyal ket saan metlaeng a dimmalan iti konsultasyon sakbay a naiyimplimintar.
Gapu iti dayta, kidkiddawenda kenni President Ferdinand Marcos Jr. a mangidadaulo metlaeng iti Economy and Development (ED) Council a suspindirenna ti naituding nga implementasyon iti three-term school calendar tapno saan manen a manayonan ti parikut dagiti mannursuro.
Sigun kenni Capulong, napatpateg a risuten nga umuna dagiti mapaspasaran ita a parikut iti sektor ti edukasyon kas iti kinakurang iti silid-pagadalan, umno a pasilidad, ken mannursuro katsa metten ti panangasikaso iti makidkiddaw a ₱50,000 a sweldo para kadagiti entry-level a mannursuro.
Kagiddan dayta, kwinestyunaran ti opisyal ti kalidad ti edukasyon a maipaay kadagiti estudyante nu dagiti mismo mannursuro ket dumaldalan iti nakaro a parikot.//Bombo Rob Dominguez
