BAGUIO CITY – Imbinglay ti maysa nga Igorot SAF commander ti kapadasanna kabayatan ti panakilablabanda kadagiti terorista sadiay Marawi City.
Iti panakipatang ti Bombo Radyo kenni PSupt. Mario Mayam-es, dadaulo ti second battalion ti PNP-SAF, kinunana a saan a ti tama ti bala ti kasakitan a narikna daytoy kabayatan ti panakilablabanda sadiay.
Kinunana a ti kasakitan para kenkuana ket ti mapukawan iti katropa a nakadkadwana idi mangan ken iti innaldaw nga ar-aramiden daytoy.
Dinakamatna a nu agawid dagitoy ket apagbiit ngem ti panunotda ket adda sadiay Marawi isut gapuna a dagusda nga agsubli gaputa saanda a kayat nga ibati dagiti kakadwa dagitoy.
Immapela met daytoy iti panagkararag dagiti kakailian tapnu malpasen ti riribok iti nasao a siudad ken awanen ti madangran wenno pumusay a kadwada tapnu agkakadwa dagitoy nga agawid.
Dinakamatna nga iti agdama ket nakorner dagiti terorista iti maymaysa a lugar ken pinalawlawan ti tropa ti gobyerno isut gapuna a bassit ti tsansa dagitoy a makalibas.
