Impakaammo iti Metropolitan Manila Development Authority (MMDA) a minimal laeng ti nagbalin nga epekto iti inkasa a tigil-pasada iti transport group a Manibela a nangrugi idi December 9.
Sigun kenni MMDA Traffic Enforcement Group Director Victor Nuñez, saan a pudno ti maibagbaga a pinaralisa ti nasao a tignay ti parapubliko a transportasyon.
Innayon ni Nuñez a bassit laeng dagiti pasahero a nataktak ti panagbiahena gapu iti tigil-pasada gapu ta agtaltalinaed a normal ti parapubliko a transportasyon kalpasan nga adu pay a jeep, bus ken daduma pay a parapubliko a lugan ti nagpasada.
Immuna metten a pinagsaganaan ti nasao nga opisina daytoy ken mangipaayda koma iti libreng sakay ngem saandan nga intuloy tapno awan ti kakompitensya dagiti agpaspasada.
Kabayatanna, manamnama met ita nga aldaw nga agleppas ti tallo nga aldaw a tigil-pasada iti Manibela a paset ti panagprotestada iti maatap a saan a nainkalintegan a panagmulta, nabuntog a proseso iti panag-renew kadagiti prangkisa ken ti maatap a panaraira iti payola iti Department of Transportation (DOTr), Land Transportation Franchising and Regulatory Board (LTFRB), ken iti Land Transportation Office (LTO).
