[photo credit to owner]
BAGUIO CITY – Indeklara ni Mayor Mauricio Domogan ti total ban wenno ti panakairikep amin dagiti pagminasan ken panakaisardeng ti operasyon dagiti small scale miners sadiay Sitio Wabak, Barangay Camp 7, Baguio City.
Imbilinna pay ti panakaipila ti kaso kontra kadagiti maseknan nga small scale miners.
Sigun kenni PCI Francisco Cacas, dadaulo ti BCPO-Station 6, idi August 2014 ket adda ti nangipila iti reklamo kontra iti operasyon ti minas iti nasao a lugar ken impanamnama met dagiti minero nga isardengda ti panagminas dagitoy.
Nupay kasta, idi July 2015 ket naipaayan iti stoppage order dagiti siyam nga indibidual gapu iti panagminasda sadiay ken idi October 2015 ket naginspeksion manen ti Baguio City PNP sadiay Sitio Wabak a nangsitaranda iti sangapulo ket maysa a minero.
Kinunana a gapu iti daytoy ket naipaayan manen dagiti nasao a minero iti stoppage order.
Dinakamatna nga idi napalabas a bulan ti November ket naginspeksion manen sadiay dagiti kameng ti Mines and Geosciences Bureau – Cordillera ken ti BCPO-Station 8 a nangtakwatanda nga adda manen ti sabali nga innem nga indibidula nga agminminas sadiay Sitio Wabak.
Naamuan a saan a nakemmeg dagiti nasao a minero ken kinataripnongda ti mayor tapnu kiddawen ti panakaituloy ti panagminasda iti nasao a sitio ngem saan daytoy a pinatgan ti mayor.
Nailanad iti pammilin ti mayor a ti BCPO-Station 8 ti mangipila iti kaso kontra kadagiti maseknan a minero ken dagitoy pay ti mangiparikep kadagiti pagminasan sadiay Sitio Wabak.
