BAGUIO CITY – Imbalakad ti lokal a konseho ti Baguio ti panangikalikagum ti Inter-Agency Task Force ti siudad iti panangiparang dagiti local tourist manipud Region 1 wenno Ilocos Region iti balido a pammaneknek iti residency ken identity sakbayda nga agpasyar ditoy lokalidad.
Nailanad daytoy iti resolusyon a pinirmaan ti lokal a konseho ti Baguio a kangrunaan a pinutar da Councilor Mylen Victoria Yaranon ken Councilor Francisco Roberto Ortega VI.
Sigun kadakuada, babaen iti daytoy nga addang ket matulongan dagiti otoridad a mangipasigurado a dagiti turista a sumrek iti siudad ket pudno a taga-Ilocos Region ken awanan dagitoy iti risgo iti salun-at.
Inaprobaranda ti resolusyon kasaruno ti nabukel a plano para iti panakailukat ti turismo iti nagbaetan dagiti residente ti Baguio City ken dagiti probinsia iti Region 1 a posible a marugian inton September 21.
