BAGUIO CITY – Dumandanon ita iti 6,000 agingga 8,000 wenno nasursurok pay ti bilang dagiti turista ti linawas a mapaspasangbay ti Baguio City.
Iti interview ti Bombo Radyo Baguio, imbinglay ni City Tourism Operations Officer Engr. Aloysius Mapalo a maar-artapan ti 2,000 a naituding a bilang dagiti turista a mapalubosan a makastrek iti siudad iti innaldaw.
Inlawlawagna met a makaap-apektar iti datus ti tourist arrival ti siudad dagiti dadduma pay a sumsumrek iti Baguio kas kadagiti essential travels wenno APORs.
Kinunana nga idi napalabas a Biyernes ket dumanon iti 2,600 ti napasangbay ti siudad bayat a nadanon metten ti limit a bilang dagiti registrants a turista para ita a weekend.
Innayonna a manamnama pay ti panagngato ti bilang dagiti agrehistro iti VISITA app nangruna iti masungad a Yuletide Season gapu iti tarigagay dagiti turista a mabuya dagiti insagana ti siudad para iti daytoy.
Kabayatanna, imbinglay ni Engr. Mapalo a maad-adal ita ti panakaibangon ti ti bukod a triage ti Marcos Highway Checkpoint ken ti Naguilian Road tapnu amin dagiti awanan ti HDF Form ket maipasidong laengen iti triage tapnu maksayan ti attidog a pila iti central triage sadiay Baguio Convention Center.
Kinunana pay a nangrugin ti panaglukat ti bokod a triage dagiti tallo a hotels ditoy siudad ken manamnama pay ti panagsurot ditoy dagiti dadduma pay a hotels tapnu ditoyen nga agdiretso a ma-triage dagiti kliente dagitoy.
Malaksid iti dayta, manamnama met ti panangipasdek dagiti dadduma a terminal ti bus iti bukod dagitoy a triage center.
Innayon ni Engr. Mapalo a posible pay nga ad-ado a turista ti maakomodar ti siudad a nasursurok pay iti 2,000 a limit tunggal aldaw nangruna ita a bumabbaban ti kaso ti COVID-19.
