BAGUIO CITY – Nakemmeg ti maysa a nakauniporme a traffic enforcer ti Land Transportation Office (LTO) a high value individual iti buy-bust operation nga insayangkat dagiti operatiba ti PDEA-Cordillera sadiay Suello Village, Santo Tomas Proper, Baguio City idi agsapa kalman.
Nabigbig daytoy a ni Ginno Manolo Castillo Banta, 30-anyos, baro, kameng ti Flying Squad ti LTO-Baguio, residente ti Bayan Park, Aurora Hill, Baguio City ken high value target ti PDEA.
Nakumpiskar kenkuana ti dua a pakete ti maatap a shabu nga agdagsen ti 2.5 grams ken aggatad ti agarup nasurok P17,000.
Nakumpiskat metlaeng kenkuana ti maysa nga sling bag a naglaon ti drug paraphernalia, LTO ID ken ti inaramatna a cellphone iti panakitransaksionna iti operatiba ti PDEA-Cordillera.
Narekober pay kenni Banta ti naaramat a buy-bust money.
Iti agdama, sumangsango daytoy iti kaso a panaglabsing iti Comprehensive Dangerous Drugs Act of 2002.
Maibasar par iti report ti PDEA-Cordillera, timaud ti tension idi nagkedked ni Banta manipud iti panagkemmeg kenkuana dagiti operatiba ken nagsumitir laeng daytoy iti arresting team kalpasan a nagpakita ti back-up team nga armado iti assault rifles.
Im-imbestigaranda met ita ti sigud a kaso ni Banta mainaig iti iligal a droga ken no apay a napalubosan latta daytoy a nagtrabaho iti LTO iti baet ti nasao a kaso daytoy.
