BAGUIO CITY – Manamnama a matingiting inton Marso 8 ti petision dagiti transport group ditoy lokalidad a manayonan iti ₱3 ti agdama a plete kadagiti Public Utility Jeepney (PUJs).
Iti interview ti Bombo Radyo Baguio kenni Pat Evangelista, presidente ti asosayon dagiti transport group iti Cordillera ken Region 1, kiniddawna ti suporta ken panakaawat ti publiko nangruna dagiti maapektaran a commuters.
Kinunana nga iti kanito a mapatgan ti ₱3 a kanayonan a plete ket agbalinen a ₱15 ti minimum a plete manipud iti sigud a ₱9.
Dinakamatna a ti ₱3 a kiddaw dagiti transport group iti Cordillera ket maitunos iti apela dagiti transport group iti NCR, Region 1, 3 ken Region 4.
Impeksana a patgan koma ti Land Transportation Franchising and Regulatory Board ti kiddaw dagitoy nangruna ta kakaasi ita dagiti apektado iti panagngato ti presyo ti produkto a petrolyo partikular iti operasyon dagiti jeepney.
Inkalinteganna nga umno laeng a mapagbalin a ₱15 ti plete gaputa naibasar daytoy iti agdama a komputasyon kagiddan ti panagngato dagiti kangrunaan a pagkasapulan.
Inlawlawagna a provisional authority laeng ti panagngato ti plete no sadino maipatungpal laeng kabayatan ti nangato a presyo ti produkto ti petrolyo.
Kagiddan iti daytoy, mangnamnama ni Evangelista nga aksionan ti gobierno ti agdama a pakaseknanda.
Inyunay-unayna a nasken a maaksionan ti pakaseknanda iti kabiitan a panawen nangruna ta agingga ita ket saan pay a naipaay ti P6,500 subsidiya nga inkari ti gobierno ken saan nga amin a driver ken operator ket makapagnumar iti daytoy.
