Imbabawi ni House Speaker Bojie Dy ti travel clearance ni Ako Bicol Partylist Representative Zaldy Co ken imbilinna ti panagawid daytoy iti Pilipinas nu sadino, sangapulo laeng nga aldaw ti naipaay a pawayway.
Daytoy ket tapno masungbatan ni Co dagiti akusasyon kontra kenkuana mainaig kadagiti nadadagsen a pakaseknan kas iti naanomalyaan a flood control projects.
Mangnamnama ni Dy nga agtulnog ni Co iti pammilin daytoy nangruna ket kasapulan ti pisikal a panakipaset ni Co kadagiti maipatungpal nga imbestigasyon ken panagdengngeg seknan iti nasao nga isyu.
Kagiddan dayta, naballa-ag ti house speaker a mabalinda a mangipatungpal iti kaskenan a panangdisiplina ken ligal nga aksyon kenni Co iti kanito a saan nga agtulnog daytoy iti naibilin kenkuana.
Maipalagip nga inrekomendar ni Navotas City Representative Toby Tiangco kenni Dy a sukimatenna ti pudno a medical condition ni Ako Bicol Party-list Representative Zaldy Co.
Sigun kenni Tiangco, kasapulan a makiddaw ti medical certificate ni Co tapno maduktalan nu ti sakit daytoy ket life-threatening.
Kaspangarigan saan a narisgu unay ti kasasaad ti salun-at ti sigud nga House Appropriations Committee Chairperson, impetteng ni Tiangco nga awan iti rason tapno saan nga agawid daytoy iti Pilipinas.
Kabayatanna,pagaw-awiden metlaeng daytoy ni House Majority Leader Sandro Marcos tapno sangwen dagiti akusasyon gapu ta patien ti anak ti presidente a nakaron a maap-apektaran ti Kamara.
