BAGUIO CITY – Manarimaan ita ti negosasyon iti nagbaetan dagiti tribo ti Tinglayan ken Tulgao sadiay probinsia ti Kalinga tapnu marisut ti timmaud a tribal war dagitoy.
Iti panakipatang ti Bombo Radyo kenni Tinglayan Mayor Sacrament Gumilab, kinunana a rimsua ti nasao a tribal war kalpasan a saan a nagkinaawatan ti dua a tribo mainaig iti boundary dispute dagitoy.
Kinunana nga idi kanikadua ket naaddaan iti rinnupak ti dua a tribo a nangrugi iti alas nuebe ti agsapa agingga alas kwatro ti malem ngem simmardeng laeng idi simmangpet sadiay dagiti militar ken pulis.
Innayonna nga agtultuloy ti panakitungtungda kadagiti ‘pangat’ wenno tribal leaders ti dua a tribo tapnu masolosyonan ti rimsua a parikot.
Maipalagip nga ad-adda a bimmara ti tensyon kalpasan a maysa a kameng ti Tinglayan tribe ti napaltogan sadiay Akafu, Poblacion, Tinglayan.
