BAGUIO CITY – An-anupen ita ti pwersa ti gobyerno dagiti maatap a miyembro ti New People’s Army (NPA) sadiay Sitio Timmapaya, Barangay Namal, Asipulo, Ifugao.
Kasaruno daytoy ti engkwentro iti nagbaetan ti 54th Infantry Batallion (IB) ti Philippine Army ken dagiti maatap a kameng ti rebelde a grupo idi rabii kalpasan a nagresponde dagiti soldado idi nakaawatda iti mensahe seknan iti maatap a panangbutbuteng dagiti NPA iti nasao a lugar.
Nadangran iti nasao nga engkwentro ti maysa a kameng ti 54th IB bayat a patienda nga ad-adu ti nadangran iti benneg ti NPA gapu iti nakitada nga adu a tedted ti dara iti nakapasamakan ti engkwentro.
Maibasar iti report, dagus a nakalibas dagiti rebelde ken dagiti nadangran a kakadua dagitoy idi nangrugi a simmipnget ti aglawlaw ken maatap a nagkamang dagitoy iti Mt. Capan iti nasao metlaeng a lugar.
Narekober ti 54th IB ti maysa a calibre 5.56 mm M653 ken maysa a magazine ti paltog.
Binalakadan met ni Lt. Col. Nicolas Quemado Jr., commanding officer ti 54th IB dagiti soldado iti panagtalinaed dagitoy nga alerto gaputa saan pay laeng a nalpas ti operasyonda kontra kadagiti rebelde.
Maipalagip a nakarinnupak ti pwersa ti gobyerno dagiti maatap a kameng ti NPA sadiay Camp 4, Tuba, Benguet kalpasan nga inuram dagiti nagpabigbig a rebelde ti dua a trak ti Philex Mining Corporation sadiay Itogon, Benguet idi Pebrero 9.
