BAGUIO CITY – Agkasapulan ti tulong pinansiyal ti Evelio Javier Memorial National High School – Piminggan Annex ken Saguitlang Annex sadiay Tuba, Benguet para iti panakagatang ti uniporme dagiti 43 nga estudyante nga atleta iti District Athletic Association Meet ita a bulan.
Inlawlawag ni Ansagan Barangay Kagawad Amalia Daping a dua paylaeng kadagiti atleta ti nakagatang ken nakapagpadait iti uniporme.
Kinunana nga awan ti maigatang dagiti nagannak dagiti dadduma nga atleta kadagiti pagkasapulan dagiti annakda gaputa awan unay ti mailako dagitoy a mula a nateng gapu iti epekto ti nepnep.
Kabayatanna, immapela ni Florence Pawig, Teacher-in-Charge iti nasao a pagadalan kadagiti naayat nga ag-sponsor a mangipaay iti kompleto a jersey nga uniporme dagiti atleta.
Kinunana a mabalin nga agturong iti mismo a pagadalan dagiti naayat a tumulong kadagiti atleta a makipaset iti nasao a pasalip sadiay Tuba Central School.
Makipaset dagitoy kadagiti ay-ayam a pakaibilangan ti billiards, volleyball, basketball, track and field, table tennis, sepak takraw, chess, arm wrestling ken wrestling. (-with Bombo Florence Paytocan)
