Agkidkiddaw dagiti umili sadiay Camp 6 Tuba, Benguet partikular dagiti tallo pulo ket innem a pamilya a naapektaran iti napasamak nga uram sadiay itay laeng nabiit.
Iti pannakiuman ti Bombo Radyo kenni Johnny Dogao ti Brgy. Captain sadiay Camp 6 Tuba, Benguet, kinunana nga agkasapulan paylaeng dagiti biktima kadagiti hygiene kits, taraon, cash ken dadduma pay.
Nupay kasta, kinunana a nasaysayaat laengen a kwarta ti ipaay dagiti naayat a tumulong agsipud ta agsubsubran dagiti naipaay a lupot tapno makatulong kadagiti biktima a mangrugi manen.
Malaksid iti dayta,mabalin metlaeng a mangipaay dagitoy iti materyales agsipud ta addan metten dagiti darat a naideliver sadiay para iti pannakaipatakder manen dagiti pagtaengan dagitoy.
Dagiti met naayat a mangipaay iti tulong ket mabalin laeng nga iturong iti barangay hall iti nasao a lugar.
Mainaig iti dayta, 80% metten ti nadalusan kadagiti debris kadagiti nauram a pagtaengan no sadino dadduma kadagitoy ket mabalin manen a pangipatakderan iti pagtaengan.
Iti agdama, maur-uray paylaeng a sumangpet dagiti cemento a maaramat para paylaeng iti pannakaipatakder iti baro a pagtaengan dagiti biktima iti nasao nga uram.
Innayonna pay a posible a maiparekep ti Kennon Raod kadagiti byaheros a saan a residente sadiay para iti pannakaideliver a dagus dagiti materyales a maideliver sadiay.
