BAGUIO CITY – Nagtunos manen dagiti mayor ti Baguio-La Trinidad-Itogon-Sablan-Tuba-Tublay (BLISTT) area para iti kanayonan a kooperasyonda iti kampanya kontra iti COVID-19.
Partikular a napagnumuan dagiti mayor iti BLISTT area ti panagkaykaysa ken panagtunos kadagiti aktibidad kontra iti COVID-19 partikular iti testing, contact tracing, isolation ken treatment.
Sigun kenni Baguio City Mayor Benjamin Magalong, kasapulan a mapatibker met ti COVID testing dagiti kabangibangda a munisipyo iti Benguet tapnu maipada dagitoy iti testing capabilities ti siudad.
Inkarina a maibingayan dagiti kameng ti BLISTT area ken Kapangan manipud iti marathon testing activity ditoy Baguio nga isayangkat ti Bases Conversion Development Authority (BCDA) inton October 26-28.
Kinunana a 3,000 a swab testing ti maisayangkat iti siudad bayat a maipaayan iti 1,100 a test kits ti Benguet, no sadino, 400 iti La Trinidad, sag-200 iti Tuba ken Itogon ken sag-100 iti Sablan, Tublay ken Kapangan.
Inkarina metlaeng ti panakaipaay ti 5,000 a viral transport media iti BLISTT area malaksid kadagiti personal protective equipment.
Innayonna nga ituloyda ti panangmonitor iti contact tracing program nga imbingay ti siudad kadagiti ili iti Benguet tapnu mapatibker pay ti contact tracing capabilities dagitoy.
