BAGUIO CITY – Agpatpatulong iti Sangguniang Bayan ti La Trinidad, Benguet dagiti legal a lot owners iti Piripin Bato sadiay Barangay Pico para iti panakarisut ti parikutda kadagiti illegal settlers a nang-ukopar iti lote dagitoy.
Sigun iti panakabagi dagiti Pamilya Amos, Nabus ken Costina, nabayagen a parikut dagiti nasao nga illegal settlers a nagpatakder payen ti babbalay iti lote dagitoy.
Atapenda a miembro ti CPLA dagiti nasao nga illegal settlers gaputa kas maibasar iti report dagiti kailyanda sadiay Piripin Bato ket nakasuot iti nangisit a t-shirt nasuratan iti CPLA dagiti nasao nga indibdiual ken dagiti dadduma kadagitoy ket armado ken no mamingsan ket makangkanggegda iti kanalbuong ti paltog.
Naamuan nga adun a kaso ti impila dagiti legal a owners kontra kadagiti illegal settlers isut gapuna a nangipaulog ti korte iti pammilin para iti status quo iti nasao a lugar ngem agtultuloy latta ti panangipasdek dagiti nasao nga indibidual iti pagtaengan sadiay.
Naamuan pay a naming adu a daras a nagturong iti nasao a lugar dagiti pulis ngem dagitoy ti irekreklamo ken butbutngen dagiti nasao a maatap nga illegal settlers ken tuttutukanda iti paltog.
Sigun met kadagiti konsehal, ammuenda pay ti pudpudno a sitwasyon iti nasao a lugar sakbayda a mangipatungpal iti kaskenan nga addang.
