![](https://img.bomboradyo.com/baguio/2021/11/TOURISM.jpg)
BAGUIO CITY- Inaprobaran ti Provincial Task Force ti panaglukat manen dagiti tourism sites iti probinsia ti Benguet.
Nupay kasta, iti interview ti Bombo Radyo Baguio, inlawlawag ni Provincial Tourism Officer Eleazar Carias nga awan ti nakedngan a partikular nga aldaw a panaglukat dagiti tourism sites kadagiti munisipyo.
Sigun kenkuana, daytoy ket gaputa kasapulan a mangbukel dagiti 13 a municipal governments iti bukod dagitoy a pagalagadan a masurot iti panaglukat ti turismo iti munisipyoda.
Innayonna nga adda ti binukel ti Provincial Tourism Office a provincial guidelines iti panaglukat ti turismo ken nasken a daytoy ti pagbasaran dagiti munisipyo iti buklenda a pagalagadan.
Dinakamatna nga iti provincial guidelines ket nasken a kadagiti laeng umili dagiti munisipyo ti Benguet ken iti Baguio ti mabalin a sumarungkar kadagiti pagpasyaran iti probinsia.
Gapu iti daytoy, kinuna ni Carias a nasken nga urayen pay ti publiko ti paka-ammo dagiti municipal governments iti panaglukat ti turismo dagitoy ken dagiti pagalagadan a masurot.
Innayonna pay a mabalin to a mailukat ti turismo ti probinsia kadagiti dadduma a rehion no sumayaat to ti sasaaden ti panawen.
Dinakamatna metlaeng nga adda metten dagiti tourism workers iti probinsia a nabakunaan kontra iti COVID-19.
Kabayatanna, imbinglay ni Carias nga adda met dagiti binukelda nga aktibidad mainaig iti turismo para iti panakarambak ti Adivay Festival.
Sigun kenkuana, adda ti ‘vaccination to vacation’ a pagpilyanda kadagiti residente ti Benguet a fully vaccinated nga ipasyarda iti masakupan ti probinsia ken adda ti “man adivay shi shontog” wenno ti mountain trekking para kadagiti empleyado ti provincial government.