ATOK, BENGUET – Agtultuloy ti panagdur-as iti sektor ti turismo ti Atok, Benguet.
Iti panakiuman ti Bombo Rdayo kenni Councilor Edward Haight ti Atok, kinunana a mas ado ti turista a nagbisita iti nasao a munisipyo kadagiti napalpalabas a bulan no idilig idi napalabas a tawen.
Sigun kenni Haight, ti kangrunaan a tourist destination a bisbistaen dagiti turista ket ti Nothern Blossom, Sakura Park, Haight’s Place, Mt. Olis ken daduma pay.
Innayon ni Haight nga iti agdama ket panggepda a mas pasayaatenda pay ti Osukan Spanish Trail a naaramid kabayatan ti regime dagiti Espanyol tapno mas pasyaren daytoy dagiti turista.
Iti agdama, dumanon iti agarup sangapulo a destinasyon ti mabalin a mapasyar sadiay.
Iti sabali a bangir, kiddaw ni Haight kadagiti amin a turista nga agturturong iti nasao a munisipyo nga agbayad iti entrance fee a P50.
Makidkiddaw met laeng ti koordinasyon dagiti travel entours tapno iturongda umuna dagiti turista wenno dagiti bisita iti munisipyo tapno agparehistro.
Imbinglay ni Haight a para iti nasaysayaat a panakakolektar iti entrance fee ket mapangpanggep ti panaka-adda iti checkers a kas ar-aramiden ti Sagada.
