Naapektaran iti turismo ti probinsya ti Kalinga kagiddan ti panagwaras ti fake news wenno saan a pudno a damag iti social media maipapan iti mapaspasamak a tribal war sadiay.
Iti panakiuman ti Bombo Radyo kenni Jesse Maguiya, Information Officer IV ti Tabuk City, bimmasit dagiti turista kasta met a nagbabawi dagiti sumagmamano nga investors gapu iti sayangguseng nga agwarwaras.
Malaksid iti dayta, bimmasit metlaeng dagiti bilang dagiti motorista nga agdaldalyasat kadagiti kalkalsada tunggal rabii ken naapektaran dagiti residente gapu ta mangipasimudaag a nagulo dagitoy.
Nupay kasta, inyunay-unay ni Maguiya a saan a pudno dagiti agwarwaras a damag gapu ta “peaceful” ti nasao a probinsya ken dagus met a marisrisut dagiti anyaman a saan a panagkikinaawatan babaen iti panakitunnulong dagiti elders wenno lallakay.
Konkondenaren met ti nasao a lokal a gobyerno dagiti nasao a banag rason a manamnama a maaramid ti maysa a resolution mainaig iti daytoy.
Kabayatanna, aw-awisen ni Maguiya ti publiko nga agbisita iti lugar dagitoy tapno makitada nga agtaltalinaed ti linak ken kappia kasta met a ti nasao a lugar ket addaan iti “diversity of culture” ken saan laeng nga y-kalinga ti agnanaed sadiay.
