Naobserbaran ti panagbaba iti bilang dagiti turista a sumarsarungkar idiay Batad, Banaue, Ifugao, nu sadinno masarakan ti Banaue Rice Terraces.
Iti pannakiuman iti Bombo Radyo Baguio kenni Barangay Captain Romeo Heppog, kinunana a dakkel ti nagbalin nga epekto iti agdama a krisis iti pagilian iti turismo iti lugar, nu idilig kadagiti napalabas a tawen.
Sigun kenkuana, maibasar iti registration records, nakailista ti barangay iti nasurok 100 agingga 200 tourist arrivals. Nupays kasta, kadagiti naglabas a lawas ket nakita ti panagbangon ken panagngato iti bilang dagiti turista.
Namnamaen ni Heppog nga ad-adda pay nga umadu dagiti sumarungkar a bisita iti maisayangkat a 4th Iwang Ad Batad wenno Tinawon Rice Harvest Festival inton Mayo 31, 2026.
Kabayatanna, malaksid iti Batad, kinuna iti opisial nga adu pay ti mabalin a pagpasyaran kadagiti kaaruba a lugar a kas iti Cambulo Village, Pula trekking road, ken ti Mt. Amuyao a masarakan iti nagbaetan iti Barlig, Mountain Province ken Ifugao. Mabalin metlaeng a sarungkaran ti Bangaan Rice Terraces ken dadduma pay a destinasyon iti dadduma a lugar.
Impasigurado iti barangay nga umdas dagiti lodging house idiay Batad, ken nu kaspangarigan saan daytoy nga umdas, makikoordinarda kadagiti umili tapno luktan dagiti pagtaenganda kas temporario a pagdagusan, nangruna iti manamnama a panagturong dagiti bisita iti 4th Iwang Ad Batad wenno Tinawon Rice Harvest Festival.
