--Ads--
BAGUIO CITY – Nakemmeg ti maysa a turista iti checkpoint operation nga insayangkat dagiti otoridad sadiay Kilometer 49, Sayangan, Paoay, Atok, Benguet idi kalman.
Nabigbig daytoy a ni Jonathan Bista Esteron, 25-anyos, baro, awanan trabaho ken residente ti Block 2, Lot 14, Teresa Homes, Tarlac.
Nakumpiskar kenkuana ti nangisit a backpack a naglaon ti tallo a balkot ti mapapati a napagango a bulong ti marijuana nga agdagsen ti dua a kilo ken aggatad ti P240,000.
Sumangsango ita ti turista iti kaso a panaglabsing iti RA 9165 wenno ti Comprehensive Dangerous Drugs Act of 2002. (-with Bombo Nikki Agsiweng)
