ATOK, BENGUET-Mapalpalagipan dagiti turista nga agbalon kadagiti napupuskol a jacket ken agbado metlaeng kadagiti napupudot a bado iti kanito nga agturong wenno agpasyar dagitoy sadiay Atok, Benguet.
Daytoy ket kasaruno ti nalammin a paniempo kagiddan ti pannakaideklara ti habagat iti Pilipinas.
Iti pannakiuman ti Bombo Radyo kenni Atok Councilor Edward Haight, kinunana a napinpintas nga agtalinaed lattan dagiti turista kadagiti rooms dagitoy nangruna no napigsa ti tudo para iti seguridad dagitoy.
Nagpalagip metlaeng daytoy kadagiti turista nga agbalon iti bukodda nga agas tapno adda ti aramaten dagitoy iti kanito nga adda ti emergency.
Kagiddan dayta, nagyaman daytoy iti agtultuloy a panagturong wenno panagpasyar dagiti turista iti nasao a munisipyo.
