Nagballaag ni PCol. Larry Buansi, Regional Chief ti Philippine National Police Anti-Cybercrime Group Regional Anti-Cybercrime Unit iti rehiyon Cordillera kadagiti turista nga agturturong iti siudad ti Baguio a saan dagitoy a dagus a mamatpati kadagiti mangidiadiaya kadagiti accommodations iti nasao a siyudad.
Sigun kenni PCol. Buansi, adu dagiti mabikbiktima kadagiti online bookings ita a yuletide season.
Impettengna a tapnu masigurado a ligal dagiti accommodations a maidiadiaya, maibalbalakad a bisitaenda ti baguio.visita.gov tapnu saan dagitoy a mabiktima iti peke nga accommodations.
Mainaig iti dayta, imbinglay met ni Atty. Noel Neil Malimban, Regional Director ti Bangko Sentral ng Pilipinas North Luzon Regional Office a maysa nga scam nga agraraira ita a holiday season ket ti panagaramat dagiti sumagmamano nga indibidual kadagiti counterfeit wenno peke a kuarta.
Nupay bassit ti mairekreklamo iti rehiyon Cordillera nu idilig kadagiti kabangibang a rehiyon, adda latta dagiti sumagmamano a kaso a maiumuman kadakuada seknan iti daytoy.
Gapu iti dayta, idagdagadag ni Atty. Malimban kadagiti umili iti rehiyon Cordillera nga ag-anad dagitoy manipud kadagiti scammers.
