Impaturay ti maysa a nanang idiay Kentucky nga ay-ayamen ti anakna a lalaki ti smartphonena.
Kas metlaeng kadagiti daduma a nagannak, kadawyan nga ipaiggem wenno ipaay-ayamda dagiti phone dagitoy kadagiti annakda gapu ta epektibo a mangpatalna iti kinaalikuteg dagitoy.
Ngem ita ta dakkel ti nagdur-asan iti teknolohiya, adun a banag iti maaramid babaen iti maysa laeng a click, kas iti panag-order kadagiti anyaman a banag.
Ti dakesna, nu masobraan ti maicheck-out ken saan a karaman daytoy iti budget, kas iti 70,000 a Dum-Dum Lollipops nga inorder ti anak ni Holly LaFavers nga agbalor iti $4,200 wenno katukad iti P234K.
Sigun iti nasao a babae, naklaat idi adda iti simmangpet a 30 a kahon iti lollipop nu sadino, tunggal maysa iti daytoy ket naglaon iti 2,340 a piraso iti nasao a candy.
Inaklon met ti anakna a second grader a daytoy ti nangicheck out kadagiti lollipop kabayatan ti panagay-ayamna iti phone iti nanangna.
Iti baet dayta, napatgan ti kiddaw ti babae nga isubli iti online store ti walo kadagiti tallo pulo a kahon iti lollipop ken maala ti refund kadagitoy.
Nagbalen met nga instant business woman daytoy gapu ta kinasapulanna nga ilako dagiti inorder ti anakna a lollipop nupay adu dagiti nagkumbidar a manggatang kadagitoy.
