Kidkiddawen ni Ukrainian President Volodymyr Zelenskyy kenni President Ferdinand ”Bongbong” Marcos Jr. a mangipatulodda ti Filipino mental health workers idiay Ukraine tapno maipasigurado a matulungan dagiti suldado a makilablaban para iti pagilian dagitoy.
Iti panagtaripnongda kenni President Ferdinand Marcos Jr iti palasyo ita nga aldaw, kinunana a kasapulanda ti “mental health workers” para kadagiti suldado ken mangilablaban iti baet ti agtultuloy a panagsususpiat sadiay kontra iti Russia.
Imbinglay ti Ukrainian President a marigatan dagiti umili sadiay nga agadal manen.
Pinagyamanan ti nasao nga opisial iti Pilipinas iti tulong a maipaay a kas ti agas ken dadduma pay.
Impasigurado met ni President Marcos Jr a mangipatulodda ti “Filipino mental health workers” para kadagiti suldado.
Impeksa ni President Marcos Jr a maragsakan daytoy ken impasiguradona nga ipaayda ti tulong nangruna para kadagiti sibilyan ken inosente nga indibidual iti mapaspasamak a gubat sadiay.
Maipalagip a ti “diplomatic” a panagkadua ti Pilipinas ken Ukraine ket nagbayag ti tallo pulo ket dua a tawen manipod idi naipasdek daytoy idi April 7, 1992.
