BAGUIO CITY – Maipaspasidong paylaeng iti enrollment iti Commission on Elections dagiti mannursuro iti siudad ti Baguio nga agserbi iti masungad a 2022 National and Local Elections.
Sigun kenni City Election Officer Atty. John Paul Martin, makitaripnong metlaeng daytoy iti Department of Education (DepEd) – Baguio para iti nasao a banag inton sumaruno a lawas.
Kinunana a no agkurang ti maalada a parapubliko a mannursuro ket agala manipud kadagiti mannursuro dagiti pribado a pagadalan.
Dinakamatna a dumanon iti 2,000 a personel ti kasapulan nga agserbi a katulungan dagitoy iti masungad nga eleksion.
Nupay kasta, kinunana nga immuna metten nga impanamnama ti DepEd-Baguio nga umdas ti bilang ti teaching ken non-teaching personnel ti ahensia nga agserbi iti masungad nga eleskion.
Innayonna a kasapulan a maaddaan dagitoy ti digital signature iti komisyon kas maibasar iti itudtuding ti linteg.
