BAGUIO CITY – Impanamnama ti Department of Education (DepEd) – Cordillera a makompleto ti panakaimprenta dagiti modules dagiti estudyante a nangpili iti modular distance learning iti sidong ti learning continuity plan ti ahensia.
Sigun kenni DepEd-Cordillera regional director May Eclar, daytoy ket gaputa adda ti nakasagana a pondo para iti panagimprenta kadagiti learning materials dagiti estudyante iti rehion.
Maibasar iti datus, pakabuklan a P253.102-M ti maawat ti Cordillera manipud iti DepEd Central Office para iti panagimprenta kadagiti self-learning modules ditoy rehion.
Kinuna ni Eclar a malaksid iti nasao a pondo ket adda ti agarup P685.4-M manipud iti special education fund nga inkari dagiti nagduduma a provincial LGUs iti rehion para iti nasao a panggep.
Innayonna nga adda pay dagiti pondo manipud iti maintenance and other operating expenses dagiti pagadalan, donasyon dagiti pribado nga indibidual ken ti pondo manipud iti Indigenous Peoples Education Program.
Maawat ti Mountain Province ti kadakkelan a pondo a sarunuen ti Apayao, Ifugao, Benguet, Kalinga, Abra ken Tabuk City.
Maibasar iti datus ti DepEd-Cordillera, nakompletodan ti panakaimprenta dagiti learning modules dagiti estudyante para iti umuna a bulan ti klase dagitoy.
Naamuan nga iti agdama nga school year ket 400,105 dagiti nag-enroll nga estudyante iti Cordillera ken iti survey ket agarup amin dagitoy ket pinilida ti modular distance learning.
