Umap-apela dagiti umili sadiay Guinaoang ken Bulalacao, Mankayan, Benguet kadagiti opisyal a tumulong dagitoy iti panangipawil iti panagminas sadiay kasaruno ti mapapati a panangipilit ti maysa a mining a company partikular ti Crescent Mining and Development Corporations (CMDC) a mangituloy iti panagminasda kadagiti nadakamat a lugar.
Iti panakiuman ti Bombo Radyo kenni Alyas Mhatotz, residente sadiay Mankayan, Benguet, kinunana nga agtultuloy ti nainget a panagbantay ken panangbarikada dagitoy kadagiti masakupanda a lugar agsipud ta nakasagana a sumrek ti nasao a mining company iti lugar dagitoy.
Sigun kenkuana, ilablabanda ti karbengan dagitoy kas umili gaputa adu ti maipaayna daytoy nga epekto kas iti panakapukaw ti pagbiaganda nangnangruna ti mulmulaan dagitoy a garden, ti danum ken dadduma pay.
Kinunana a nagturong met dagitoy iti Mayors office no sadino inkari ti mayor a saan daytoy a mangipaay iti permit a sumrek ti nasao a mining company.
Gapu iti dayta, kinunana a dakkel a tulong daytoy kadakuada.
Impettengna metlaeng a nangipatungpal dagitoy iti prayer rally no sadino adu dagiti kailyanna nga umannamong iti kampanya dagitoy a “no to mining”.
Kabayatanna, innayonna pay a nakasaritada ti agtagikua iti mining company no sadino kinunana a nangidiaya dagitoy iti trabaho ngem saanda nga immannamong.
Kagiddan dayta, kiddawna a tulungan daytoy dagiti opisyal agsipud ta dagitoy dagiti addaan iti kabaelan a tumulong.
