Maipatpatungpal ti thorough study para iti umno a disenyo kasta metlaeng ti solusyon para ti kalsada nga agsisink idiay Banangan, Sablan.
Sigun kenni Sablan Mayor Alfredo Dacumos Jr., ti nasao a panangadal ket idadauloan ti Department of Public Works and Highways (DPWH) kasta metlaeng iti Department of Environment and Natural Resources (DENR).
Impeksa ni Mayor Dacumos, Jr. nga inkari ni DPWH Secretary Vince Dizon a saanna a baybay-an ti nasao a kalsada gapu ta daytoy ti nabatbati a pagnaan a sumang-at iti siudad iti kanito nga agsara ti Kennon Road ken Marcos Highway.
Impetteng met daytoy nga agtultuloy ti koordinasyonda iti DPWH ken dadduma pay a maseknan nga ahensya seknan iti nasao a pakaseknan.
Inlawlawag ti Mayor a sigud nga adda ti napagtutulagan nga agaramid da iti kalsada iti abay ti bantay wenno iti ngatuen ti agdama a kalsada.
Nupay kasta, nakitada nga adda metlaeng dagiti cracks iti ngato ti bantay no sadino ti kasasayaatan laengen a maaramid ket ti nasayaat a panangadal iti nasao a pasdek.
Imbinglay pay daytoy nga adda iti proposal idi a rangtay ti maaramid idiay. Nupay kasta, kinontra daytoy ti DPWH gapu taan met a karayan daytoy.
Iti agdama, tartarimaanen metten ti kameng ti DPWH ti kalsada bayat a maururay ti pannakaadal ken bayat a mapaplano pay dagiti amin a nasken a maplano.
Sigun pay kenni Mayor, iti kanito a bumigay ti kalsada, adda ti alternatibo a ruta a mabalin a pagnaan manipud idiay Bayabas, nga umuneg idiay Nangalisan, Asin agingga makagteng iti siudad.
Mainaig iti dayta, kagidan ti agtultuloy a saan a nasayaat a paniempo, agpalpalagip daytoy kadagiti turista iti panagganad nu dumalyasat iti kalsada nangruna iti sinking area kasta metlaeng kadagiti residente iti nasao a lugar.
