Impakaamo ti Thailand ti umuna nga ipupusay ti maysa nga indibidual mainaig iti anthrax nga addaan iti dua nga impeksion iti intero a pagilian.
Gapu iti dayta, naalerto ti publiko kalpasan a naduktalan dagiti otoridad a ginasgasut nga indibidual ti mabalin a sumango iti makapapatay a bakteria.
Maibasar iti report, maysa nga agtawen ti lima pulo ket tallo a lalaki idiay probinsia ti Mukdahan, iti amianan a daya ti Thailand iti asideg ti beddeng ti Laos, ti pimmusay idi laeng Miyerkules kalpasan a nakaptan iti anthrax.
Nakumpirmar ti gobierno iti nasao a lugar ti maikadua a kaso ken tallo a kanayonan a mapapati a kaso, nga iti agdama ket manarimaan ti imbestigasionna.
Pangpanggepen a mabakunaan ti 1,222 a baka, nupay awan pay dagiti animal a nangipakita iti pagilasinan ti sakit.
Ti anthrax ket serioso a sakit a gapu iti bacteria a masansan a mayakar babaen iti “contact” kadagiti naapektaran nga ayup wenno panagsida iti kontaminado a karne.
Saan a mairawas ti nasao a sakit babaen iti person-to-person.
Maipalagip nga idi tawen 2017, nakailista ti Thailand ti maudi a kaso ti human anthrax.
